亂打主意：二十年後

關於香港的世代問題，小友有一番可堪玩味的見解。

小友有一天，看到「非卜」忽然出現大量前記者在博文「分享」自己對八十後員工的種種觀察，直指八十後員工不值一萬元月薪，甚至「不死也沒有用」。小友說：「如果三四十歲中層人就係咁睇啲廿幾歲嘅人……到嗰班五六十後退休，我肯定呢啲公司會散。呢班做中層管理嘅，其實係冇章法嘅。有啲良知嗰班老鬼，其實心入面係知道佢哋冇咩料到嘅。

嗰啲甚麼大學校友寫專欄，寫嚟寫去都係嗰啲飯局文，只不過因為佢哋啲同學個個都有料到，位高權重，先寫到今日。嗰班五六十後，佢哋廿幾歲嗰陣，係無條件咁被拔擢。佢哋心知，上位係好Random的一個現象，或者佢哋會覺得自己係『際遇』好啦……

三四十歲嘅，無論上唔上到位，都做到好Desperate（爛做）。依家班三尾四頭嘅，就真係最搏殺的年代爭出頭，自然覺得上面啲人靠符碌，下面班友又命好又廢。到佢哋做咗高層管理，都唔知會信邊個。可能，佢哋就只會信八十後九十後行佢哋一套的人。咁就慘啦，佢哋唔會搵到好多呢啲抵得諗嘅傻仔。」

我有理由相信，現在香港勞動力結構，在經歷一場革命。三四十歲現在上位的人，犧牲所有生活、愛情，在所不惜，也要在職場撐起半邊天。我深信，只要八九十後堅持，繼續擺爛，三四十後就會要想辦法去用他們。因為，當他們知道他們請甚麼人，性格都差不多，只有一個比一個差。一天到晚請新人，轉人太多，公司也沒有辦法運作。二十年後，究竟是拚老命的六七十後堅持到底，抑或是愛自由自主的八九十後把他們激死？

看那些人一天到晚為下屬激心動氣，真是一場娛樂性豐富的真人Show。