跟電台Ｔ，這位炙手可熱的專欄作家跟學生討論什麼是報紙專欄。這是一條貼近Foucault 會問的問題：作者是什麼。What is an author？寫專欄，很多時被要求要寫一點「生活」感。什麼叫生活感？大抵是這樣的，飲飲食食、旅行見聞、專業人士對話、無病呻吟，大抵是這樣子。比方說，我在非卜向Now電視台的主持人黃慧麟先生挑機，問現在唐氏失勢了，他的啦啦隊，如左Ｘ山會如何寫呢？不到五分鐘，黃先生就回應我非卜了，說：
[左x山mode]正所謂「真」人富貴厭人窮，一個家族有錢，招惹是非，就必然架啦。有錢人響自己屋企挖深d，挖多d，有咩出奇？好多富豪都有品酒室，就梗架啦。依家d狗仔隊無處不在，富豪有時被迫要響屋企同其他朋友傾生意，梗係響一個relax既環境傾架啦，唔通響客廳傾咩？而且，富豪日理萬機，點可能跟project跟得咁緊啦？一時疏忽，俾個則師同設計師過左一棟，使唔使喊打喊殺咁嚴重？依家唐生已經立即糾正，點解hong港人繼續追殺？呢d又係唔係傳媒治港？係唔係潔癖治港？
[左x山mode part 2，呃多一日稿費mode]響中環經過獅子銀行（希望唔好有人話我蛇王），撞到富豪P。佢捉住我曰：依家俾唐唐累死，尋日立即上去搵則師傾多轉，confirm左間屋無僭建，汗都滴埋。富豪P話，有地起屋既，個個身家清白，大把水，梗係驚條命仔啦，就算僭建，一定安安全全，唔會用條命仔較飛。依家d傳媒，個個有立場，個個記者仔自己唔努力，唔查證，剩係識得仇富，咁既香港，點住得落？左x山聽完之後，真係心淡。民粹治港，傳媒追殺，有錢佬俾人嚇走晒，邊度有人肯來投資？
哈哈，來來去去都係呢幾個points：(a)傳媒民粹禍港，鬧多一下記者質素；(b)政府執法唔嚴，點解忽然執法；(c)益左專業人士，多了生意，政府／傳媒害人不淺；(d)有錢佬覺得環境唔好撤資；(d)政治互插，風氣唔好。
＊ ＊ ＊ ＊ ＊
類似的人，在另一份報章，叫活Ｘ先生。原來都是很類似的角度和態度。但他的不同是，他比左Ｘ山又有多的生活感。那種生活感，如果需要仿作，大抵如此：
我阿活呢，結婚都幾廿年啦。大家都知道夫妻之間，有起有落，就梗架啦。我都有Ｄ賓架朋友Ｄ，睇到唐唐單新聞，都擰晒頭，話：「唉，其實結過婚既人都知道，對住一個女人幾十年，梗有高潮低潮架啦。咁如果個女人話想裝修屋企囉，塞舊錢畀佢，可以換一陣安寧，咁就梗係多多錢都畀啦。」
賓架Ｄ又講得幾有道理。不過我阿活咁怕老虎乸，又點會做得出。轉過頭，又想去買對鞋啦。而家個市其實周街都八折，買野真係好平，咁樣，你話Ｄ生意點做呢？
去試下啦，叫人黎拎對鞋試下啦！賣鞋畀你果個八十後，講野又唔望住你，把聲陰聲細氣咁。都聽唔到佢講乜，我阿活決定問過第二個啦。嘩，一睇第二個個樣，望埋去，都唔知佢係仔剩女，Ｄ頭髮長過鬼，仲要摷到起晒，成個雀巢咁？乜家陣咁叫靚咩？
叫個八十後拎對鞋黎試，一試，鬼咁中意，又咁靚，又唔貴，雖然Ｄ人話正月買鞋，鞋鞋聲唔好聽，不過難得見到心頭好，咁就想買啦。點知就得返八號半同九號半，冇晒九號。八號半又太細，九號半又太大。著八號半太緊，九號半又太鬆。忽然諗起，有時，買鞋同婚姻一樣，你覺得靚啦，想買，著上腳，鬆鬆緊緊，其實有苦都只有自己知！不過如果畀老虎乸我將佢比喻做鞋，一定扭甩我隻耳仔！
＊ ＊ ＊ ＊ ＊
是不是很像？哈哈哈，其實，稿費係真易呃架。只不過，這些機會不是我的。因為，我不會認為健吾這品牌，會寫這樣的文章囉，不知道電台Ｔ看完這份博客之後，滿意嗎？
No comments:
Post a Comment