Saturday, June 29, 2013

如果我的孩子大學畢業


如果我的孩子大學畢業,我也希望他在面書會寫出這樣的說話。至少,他告訴我,在這世道磨練了十幾年,還有一點意志,一點理智,一點行動力,一點勇氣。而不是那些蒼白的成人,只會想「第時有冇老細請」、「點解咁唔尊重大會」、「點解唔好好行禮」……

即使學生沒有跟足儒家思想,沒有社會賢達們口中的標準答案,但他們至少用他們的思考,他們的腦袋,去為他們創造了一個屬於他們成長路中重要的一節。

各位,請花一點時間,看看這個學生的回應

有人話:
1)應該尊重畢業禮,唔應該無禮對待嘉賓,咁係對自己對學院同對嘉賓不敬;
2)讀藝術唔係大哂,唔可以無禮行為當藝術,自抬身價;
我會話:
1)
第一:梁震英並唔係嘉賓。因為佢,係經過咗一個唔關我哋事,我哋完全無say嘅所謂選舉選出嚟嘅特首,咁就無啦啦就做咗全香港大專院校嘅校監。所以,嚴格嚟講佢係自己人唔係嘉賓。
第二:佢唔單止對學院嘅發展無任何貢獻,仲要用咗一年時間證明俾我哋睇,佢做唔到嘢之餘,仲要質疑我哋點解要唔信佢搞到佢做唔到嘢。大佬,信任唔係與生俱來,你行出嚟我就要信你架喇?!信任,係你要自己賺番嚟架吓麻?!學你重用嗰條馬仔羅范椒芬當年話啲教師:你唔勤力,唔夠叻,啲學生梗係唔尊重你啦!(佢真係點講我唔記得,不過潛台詞係咁,想當年不知點著幾多教師把火。)
第三:已經唔關啲畢業生鐘意唔鐘意你事,係所有人根本無辦法令你聽到我哋講嘢。你話呢個唔係合適嘅場合。你話有好多渠道。喺邊到?寫信你唔覆、兜口兜面問你你話唔回應、抗議絕食你話我唔理性、靜坐到十二萬人圍你個政府總部,你都話你好清楚民情,死都要推國民教育科……咁我哋可以點呢老細?唔通真係因為人微言輕你就唔洗理我哋?說好了的摺櫈加一本薄一支筆呢?畢業生用咗三至五年時間同心血,喺一所學院終於完成佢哋嘅學位,到佢哋畢業嗰一刻,佢哋有五秒嘅時間去享受大家嘅祝福,同俾學院最高領導人扑頭,頒個學位俾佢哋。然而,佢哋都情願放棄俾人扑嘅機會,放棄受人祝福嘅機會,決定用呢五秒時間,令到佢哋嘅聲音可以被聽見,我覺得,呢五年嘅血汗,換番嚟對社會嘅觸覺同感知,先唔算係白費!呢個唔係合適嘅場合?!hey!咁邊個係咁適而有用嘅場合呀?!
第四:的確係不敬。但係不敬係手法唔係目標,就係要用如此不敬嘅手法,讓目標觀眾,即係特首,清晰接收佢哋嘅嘅意見,咪等陣間佢又話:青年人其實大部份的好支持政府嘅施政、藝文界都支持政府嘅文化政策。其實,係佢對社會大眾不敬在先,扭曲民意、用矯揉造作的說話欺騙社會大眾……劣積斑斑之下,仲公然話自己「唔敢自滿」,我係咪要重新界定「自滿」呢兩個字呀?個世界係癲咗啫,都唔洗癲得咁盡呀?
第五:其實,佢哋都係用咗自己嗰五秒鐘,去做佢哋向特首發聲嘅行動(你一世人有幾何可以向最高權力人士講五秒嘢?唔搶咪唔賴死都算係俾面啦吓麻?!),完全無阻礙典禮進行。其他無嘢想講嘅學生,係有自由同有時間正正常常、依足規矩完成佢哋嘅畢業禮,想影一張幾「莊嚴」嘅相都得。咁,又點解畢業生無權選擇點去運用自己嗰五秒呢?
2)
第一:根本就唔關係咪讀藝術事,請唔好亂咁將你唔明或唔認同嘅事物同行動,就同「藝術」扣帽子。如果唔係,你打仔都可以好「藝術」,因為個仔一定唔會認同你要打佢嘅呢個行動!
第二:無人自命過呢個發聲(抗議都算不上)嘅行動,係行為藝術,而且,如果你唔係好熟咩係行為藝術的話,請唔好亂撻啲terms,因為,咁只會令人知到你無料到,從而對你嘅話話嘅可信性作出保留。
第三:讀藝術人自己好清楚,響香港,藝術家係無地位架。你問心啦,香港人,你幾可會覺得藝術家係一份高尚嘅職業呀?你幾可覺得藝術家係社會菁英呀?咪玩我啦!我其實係點樣透過藝術,可以自抬身價呢又?!



No comments: